Әскери оқу орындарына түсу тәртібі қалай, құжат тапсыру қашан басталады? Министрлік жауабы

Қорғаныс министрлігі ведомствоның оқу орындарына түсу ережелері туралы хабарлады.

Отандық әскери білім беру жүйесіне магистратура және докторантура бағдарламалары бойынша жоғары оқу орнынан кейінгі даярлау жүзеге асырылатын Ұлттық қорғаныс университеті, үш әскери жоғары оқу орны, екі колледж және Алматы, Шымкент және Қарағандыдағы "Жас ұлан" республикалық үш мектебі кіреді.

Алматы қаласындағы Құрлық әскерлерінің әскери институты басшылық мамандықтары бойынша кадрлар даярласа, Ұшу және инженерлік-техникалық құрамның мамандарын Ақтөбе қаласындағы Әуе қорғанысы күштерінің әскери институты дайындайды. Алматы қаласындағы Радиоэлектроника және байланыс әскери-инженерлік институтында радиотехникалық мамандықтардың офицер-инженерлері оқытылады.

Министрлікке қарасты Әскери білім және ғылым департаментінің бастығы генерал-майор Жұмабек Ахметов әскери институттарға түсу үшін 30 сәуірге дейінгі мерзімде жергілікті әскери басқару органы басшысының атына өтініш өткізу керектігін айтты. Ал құжаттар 15-20 шілде аралығында қабылданады.

Биылдан бастап мерзімді әскери қызмет атқарған және қолбасшылықтың ұсынысын алған азаматтарға жеңілдіктер қарастырылмақ.

Барлық оқу кезеңінде курсанттар толық мемлекет тарапынан қамтылатын болады. Әлеуметтік пакетке ақшалай қаражат, киім-кешек, күніне үш рет тамақтану, тегін медициналық көмек және жатақханада тұру кіреді.