Экология министрі ШҚО жұртшылығымен және ҮЕҰ мүшелерімен кездесті

Серікқали Брекешев қоғам өкілдеріне Шығыс Қазақстанның экологиялық жағдайын жақсарту аясында жүргізіліп жатқан жұмыстар туралы айтып берді. Министр "Жасыл Қазақстан" ұлттық жобасының жүзеге асырылуына жеке тоқталды.

"Жасыл Қазақстан" ұлттық жобасының "атмосфералық ауа сапасын жақсарту" міндеті аясында 10 ірі қалада, соның ішінде Өскеменде 5 жыл ішінде 16 ірі өнеркәсіп кәсіпорындарындағы шығарындыларды 20% - ға қысқарту көзделіп отыр" деді  Брекешев мырза өз сөзінде.

Мәселен, осы жылдың 1-ші жарты жылдығының қорытындысы бойынша, кәсіпорындардың және  Министрліктің деректеріне сәйкес, ластаушы заттардың нақты шығарындыларының 6,7%-ға төмендегені байқалады.

Айта кету керек, ШҚО-дан "Жасыл Қазақстан" ұлттық жобасына: "Казцинк" Өскемен металлургиялық кешені ЖШС және "Өскемен ЖЭО" ЖШС кірді. «Казцинк» күкірт қышқылы өндірісін жаңғырту жобасына кірісті. 2025 жылдың соңына дейін мырыш зауытының қолданыстағы күкірт диоксиді газын кәдеге жарату қондырғысын толық тазартумен жабдықтау жоспарлануда, бұл күкірт диоксидінің шығарындыларын 20%-ға азайтуға мүмкіндік береді. Өскемен ЖЭО-да күлтұтқыш қондырғы мен 2 қазандық Агрегатта түтін газын тазарту жүйесін қайта жаңарту жүргізілді, бұл келешекте ластаушы заттардың шығарындыларын азайтуға мүмкіндік береді.

Министрдің  айтуынша, жол картасы аясында Шығыс Қазақстан облысының экологиялық мәселелерін шешу бойынша 35 іс-шара қарастырылған. 2021 жылы атмосфералық ауа сапасын бақылаудың 9 жаңа автоматты станциясы орнатылды, онда 6 негізгі ластаушы көрсеткіштер бойынша мониторинг жүргізіледі. Биыл Өскеменде қайта өңделетін 10 қабылдау пунктін жабдықтау жоспарлануда.

«Өңірдің қоршаған орта сапасының жоғары маңыздылығын ескере отырып, әкімдікке жол картасының іс-шараларын іске асыру үшін шұғыл шаралар қабылдау талап етіледі. Бұдан басқа, бүгінде біз облыстардың бөлінуін ескере отырып, жол карталарын өзектендіру бойынша жұмыс жүргізіп жатырмыз. Біз өңірдегі экологиялық ахуалды жақсартуға бағытталған жаңа іс-шараларды бірлесіп пысықтап, енгізуіміз керек» деп атап өтті Серікқали Аманғалиұлы.

Сондай-ақ, кездесу барысында экология, геология және табиғи ресурстар министрі ҚТҚ қайта өңдеу, кәріз-тазарту құрылыстарының жай-күйі, геология саласын, су және орман шаруашылығын дамыту мәселелеріне тоқталып өтті.