"Ресейге жауап береміз". Ақ үй Кремльге жаңа санкция жарияламақ

АҚШ Ресейге қарсы жаңа санкция әзірлеп жатыр, оны алдағы апталарда жариялайды. Бұл туралы Ақ үйдің баспасөз хатшысы Дженнифер Псаки хабарлады, деп жазады bbc-дің орыс қызметі.

Қаңтар айының басында АҚШ-тың экс-президенті Трамп әкімшілігі Кремльге SolarWinds деп аталған хакерлік шабуыл мен оппозициялық саясаткер Алексей Навальныйдың қамалуына байланысты қатаң шаралар пакетін әзірлеген. Алайда Трамп соңғы сәтте құжатқа қол қоюдан бас тартқан.

– Біз барлау қызметіне жұмысты жалғастыруды және бұрынғы әкімшілік дайындаған тұжырымдарды нақтылауды сұрадық. Жұмыс жалғасуда. Ресейге алдағы апталарда жауап береміз, –  деді Дженнифер Псаки.

Сейсенбіде Washington Post газеті өз дереккөздеріне сүйеніп жақын арада Кремльге қарсы санкциялар енгізілетінін хабарлаған.