"Алматыда гуманитарлық көмек дәріханаларға берілмейді"

Алматы әуежайына COVID-19 инфекциясын емдейтін дәрілік препараттардың кезекті партиясы келді. Бұл туралы ҚазАқпарат хабарлады.

Қалаға кеше кешкісін Үндістаннан жалпы салмағы 10 тонна медикамент тиеген ұшақ келіп қонған болатын. Ал 17 шілдеде Ресей Федерациясынан қажетті дәрі-дәрмек тиеген ұшақ келіп жетті.

Алматы әкімдігінің қаланы дәрі-дәрмекпен қамту жөніндегі үйлестірушісі Заңғар Сәлімбаевтың хабарлауынша, Ресейден жеткізілген дәрі-дәрмек арасында балалар мен үлкендерге арналған парацетамол, амоксиклав, меропенем және басқа да өте қажет дәрілер бар. Жалпы, 1 135 000 дана препарат жеткізілген.

Үндістан мен Ресейден жеткізілген жүк қаланың дәріхана желісін дәрі-дәрмекпен қамтамасыз ететін дистрибьюторлық компанияларға тиесілі.

Қала әкімінің тапсырмасы бойынша препараттарды дереу рәсімдеу және сертификаттау бойынша барлық жағдай жасалған. Дәрілердің еш кедергісіз жеткізілуі қатаң бақылауға алынған. Бұдан өзге, Алматыда дәрі-дәрмек жеткізушілерге пайызсыз несие беру үшін 5 миллиард теңге бөлініп, тұрақтандыру қоры құрылғаны белгілі.

«29 маусымда ірі фармкомпаниялармен, дәріханалар желісімен меморандумға қол қойылған. Осы құжат негізінде қажет дәрі-дәрмек дер кезіне жеткізілуде. Халыққа керек препараттар тізбесі кеңейіп жатыр. Біздің алдағы жоспарымыз – қаланың барлық дәріханаларын дәрі-дәрмекпен қамтамасыз ету», – дейді З. Сәлімбаев.

Жақын күндері қалаға үлкен сұранысқа ие дәрі-дәрмек тиеген кезекті рейстер келеді. Айдың соңына дейін шамамен 6,5 млн қаптамада қажетті препараттар жеткізіледі.

З. Сәлімбаев Ресейден келген жүктің гуманитарлық емес екенін айтты. Мұндағы дәрі-дәрмек қала дәріханаларына бөлініп беріледі.

«Интернетте гуманитарлық препараттардың сатылғаны туралы жалған ақпарат тарап жатыр. Бұл шындыққа жанаспайды. Өйткені, гуманитарлық көмек ешқашан жеке дәріханаларға берілмейді, ол тек мемлекеттік ауруханаларға ғана бөлінеді», - деп атап өтті ол.

Еске салсақ, бұған дейін Алматыға Ресейден 55 тонналық дәрі-дәрмек екі рейспен жеткізілген еді. Бұл - шамамен 3 млн қаптама, мұнда әлеуметтік маңызы бар 10-нан астам дәрі-дәрмек түрлері бар, оның ішінде қызуды түсіретін және COVID-19-ға қарсы препараттар жеткілікті.

Яғни, тізімде азитромицин, цефтазидим, ибупрофен, фраксипарин, метронидазол, цефтриаксон, гепарин, нимесулид, левофлоксацин, меропенем ұнтағы, эноксапарин-бинергия және басқа препараттар болды.