13 Маусым, 2020 NEWS

Е. Бабақұмаров интернаттардағы қызмет сапасына мониторинг жүргізу бойынша комиссия құруды тапсырды

almaty_akimat

Алматы қаласы әкімінің орынбасары Ержан Бабақұмаров видео-конференция режимінде Алматыдағы интернаттық ұйым басшыларының қатысуымен кәмелеттік жасқа толмағандар және олардың құқығын қорғау ісі бойынша қалалық Ведомствоаралық комиссияның отырысын өткізді.

Отырыс жұмысына Алматы қаласының мәслихат депутаты Шавкат Омаров, Алматы қаласы Білім басқармасының басшысы Ләззат Жылқыбаева, полиция полковнигі, Жергілікті полиция қызметі басқармасының басшысы Манап Саттаров, «Қазақстанның балалар үйі түлектерінің ассоциациясы» ЗТҰ президенті Рафаэль Гасанов және басқалар қатысты.

Комиссия арнайы интернаттық ұйымдардың жұмысын жетілдіру, білім саласында көрсетілетін қызметтердің сапасын арттыру, балалар үйі түлектерінің жұмысқа орналасуына жәрдемдесу, қылмыстың алдын алу мәселелерін қарады.

Қалалық білім басқармасы басшысының орынбасары Гүлнар Айтқұлованың, Қоғамдық денсаулық сақтау басқармасы басшысының орынбасары Әсел Бисенбаеваның, Алматы қаласы ЖПҚ Ювеналды полиция басқармасының басшысы, полиция подполковнигі Лейла Әліпбаеваның баяндамалары тыңдалды.

Алматыда 18 мектеп-интернат бар, оларда 3640 бала тұрады. 8 түзету мектеп-интернатында 2542 бала тәрбиленуде, олардың арасында сөйлеу, есту кемістігі бар балалар, сонымен бірге жетім балалар да бар. Барлық мекемелер шеберханалармен, ойын залдарымен және медициналық пункттермен жарақтандырылған. Соңғы үш жылда ұйымдардың тәрбиленушілеріне, жетім балалар мен ата-ана қарауынсыз қалған балаларға 259 пәтер берілген.

Суицидтің алдын алу мақсатында Психикалық денсаулық орталығының негізінде психологтардың онлайн кеңес беру жұмысы ұйымдастырылды. Осы кезге дейін 29 адамға кеңес беріліп, соңғы 4 айда сенім телефонына қала тұрғындарынан 1035 қоңырау келіп түсті, өткен жылы 1209 қоңырау түскен еді. Қоңырау шалушылардың бәріне білікті мамандардың психологиялық көмегі көрсетілді. Сонымен бірге, білім беру жүйесінің 148 маманы оқу семинарларына қатысты. Әлеуметтік педагогтар, медициналық қызметкерлер және басқа да мамандар арасынан 4 ауданда 206 адам үйрету курстарынан өтті.

Алматы қаласының Білім басқармасы жүйелі түрде интернаттық мекемелер қызметін анықталған тәртіп бұзушылықтарды көрсете отырып және олардың жойылуын бақылауға ала отырып, мониторинг жүргізеді. Тексеру барысында мемлекеттік сатып алулар, еңбек заңнамасы, санитарлық және өрт нормаларының бұзылуы сынды тәртіпбұзушылықтар анықталды.

Нәтижесінде анықталған тәртіпбұзушылықтардың бәрі жойылды. Арнайы (түзету) мектеп-интернаттардың бірқатар директорлары мен директор орынбасарлары тәртіптік жауапкершілікке тартылды.

Алматы қаласы әкімінің орынбасары Ержан Бабақұмаров балалардың сапалы білім және тәрбие алуы, тамақтануы, мекеме қызметкерлері тарапынан балаларға дұрыс емес қатынас орнатуын болдырмау, сонымен қатар, 29 жасқа жетпеген жетім балаларды баспанамен қамту  сынды мәселелерге баса назар аударды.

– Балалар – біздің болашағымыз. Интернаттық ұйым жетекшілері біздің балалардың өмірі мен қауіпсіздігіне жеке басымен жауапты. Тәрбиленушілердің заңды құқықтары мен мүдделерін бұзу фактілерін жасыруға мүлде жол бермеу керек, – деп атап өткен Е. Бабақұмаров бірқатар нақты тапсырмалар берді.

Қалалық Білім басқармасы мен білім жетекшілеріне тәртіп бұзушылықтардың алдын алу, интернаттық ұйым түлектерін жетекшілік және басқа да институттарды қатыстыра отырып жұмысқа орналастыру мәселелері бойынша жұмысты күшейту тапсырылды. Бір ай ішінде жүргізілген жұмыстар және алдағы кезеңдегі атқарылуға тиіс міндеттер жөнінде қамқорлық кеңесін өткізу тапсырылды.

Алматы қаласы бойынша Білім саласын бақылау департаменті мен Қазақстанның балалар үйі түлектері ассоциациясына қалалық интернаттық ұйымдар көрсететін қызметтер сапасының межеге сәйкес болуы жөнінде мониторингтік комиссия құру тапсырылды. Тексеруден бөлек, балалар арасында сауалнама да жүргізіледі. Сауалнама жүргізу барысында әкімшіліктің араласуына жол берілмейді.

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір