04 Қыркүйек, 2017 Саясат

Елбасы жаңадан сайланған Сенат депутаттарының жұмысына сенім білдірді

Мемлекет басшысы биыл Қазақстанда жаңғырудың жаңа көкжиектері ашылып, іргелі үдерістерді жүйелі түрде іске асыру басталғанын атап өтті.

Бүгін Мемлекет басшысы Нұрсұлтан Назарбаев алтыншы сайланған Қазақстан Республикасы Парламентінің үшінші сессиясын ашты, деп хабарлайды Qamshy.kz ақпарат агенттігі.

Отырысқа Сенаттың 46 депутаты, Мәжілістің 106  депутаты, ҚР Үкімет мүшелері, Жоғарғы сот, Конституциялық кеңесі, Орталық сайлау комиссиясы төрағалары, ҚР Президентіне тікелей бағынатын және есеп беретін мемлекеттік органдардың, ұлттық басқарушы компаниялардың басшылары қатысуда.

Қазақпараттың мәліметіне сүйенсек, алтыншы сайланған ҚР Парламентінің үшінші сессиясын ашу барысында сөз сөйлеген ҚР Президенті Нұрсұлтан Назарбаев жаңадан сайланған Сенат депутаттарының алдағы сапалы жұмысына сенім білдірді.

«Құрметті депутаттар, баршаңызды жаңа парламенттік маусымның басталуымен шын жүрегімнен құттықтаймын! Осы арада елді аралап, халықтың алдында сөйлеп, көп жұмыс жасадыңыздар. Енді жаңа күшпен әрі оймен, жаңа сессияны бастағалы отырмыз. Өздеріңіз білесіздер, 28 маусымда Сенат депутаттарының сайлауы өтіп, Парламенттің жоғары палатасының құрамы Конституция бойынша жаңарды. Атап айтқанда, барлық өңірлерде сайлау өтті, алдымыздағы алты жылдың ішінде олар сол сенімді ақтап, халыққа қызмет ететін болады. Сондықтан жаңадан сайланған халық қалаулыларын қызметтерімен құттықтап, табыс тілейік», - деді ҚР Президенті.

Мемлекет басшысы биыл Қазақстанда жаңғырудың жаңа көкжиектері ашылып, іргелі үдерістерді жүйелі түрде іске асыру басталғанын атап өтті.

«Жаңғыру үрдісі негізгі үш сала: экономикалық, саяси және рухани бағыттар бойынша өрбуде. Әрбір мемлекет осы үш мәселені назарда ұстап, өркендейтін болады. Бұл реформаның негізінде біз «Қазақстан-2050» стратегиясындағы мақсаттарымызға жетеміз. Түпкі мақсатымыз - отыз өркендеп өскен елдің арасында болу», - деді Н. Назарбаев.

Gulim Zhaqan

Әл-Фараби атындағы Қазақ Ұлттық универистиетінің филология және әлем тілдері факультетін бітірдім. 2017 жылдан бері Qamshy.kz ақпарат агенттігінің тілшісімін. 2016 жылы оқуды бітіргенімде ұстаздық ету немесе журналист болу деген екі түрлі таңдау тұрды алдымда. Біріншісін көрейін деп алғашында кішігірім курстарда сабақ беруден бастадым. Кішігірім курстардың өзінен шабыт ала алмаған мен өзгеден бұрын өзіңе үйретерің көп болуы тиіс білім бұлағы мектепке барудан тартындым. Сөйтіп шабыттардың, шығармашылықтардың мекені - журналистикадан бірақ шықтым. Жаздым, жазып жүрмін, жаза беремін - бұл менің өмірім! Болашақта өзге басылымдарға ауыссам да, қамшы қолымнан ешқашан түспейді. Осыны түсіндім.

Автормен оның Facebook парақшасы арқылы хабарласуға болады.

Жазылыңыз

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір