Білім министрлігі колледж студенттеріне қатысты мәлімдеме жасады

Білім және ғылым министрлігі колледждерге құжат қабылдау науқаны жалғасып жатқанын хабарлады. Бүгінгі таңда талапкерлерден 126 074 өтініш берілген. 

Министрліктің мәліметіне сүйенсек, биыл 97 мың білім гранты бөлінген. Сонымен қатар тегін білім алғысы келетіндер үшін квоталық санаттар тізімі кеңейтілген. Көпбалалы отбасылардан шыққан балалар үшін 5%, мәртебесі кемінде үш жыл толық емес отбасылар қатарындағы балаларға 1%, мүмкіндігі шектеулі балаларды тәрбиелеп отырған отбасылардан шыққан балалар үшін 1% квота қосылған. Егер де баллдар тең болған жағдайда квоталық санат және аттестаттың орташа балы ескеріледі.

Талапкерлер колледжге құжаттарды екі тәсілмен электрондық үкімет порталы Egov.kz арқылы немесе тікелей колледжге барып тапсырады.

Болашақ студенттер төрт мамандық пен төрт колледжге дейін таңдай алады. Қабылдау рәсімі жаңа ережелерге сәйкес жүзеге асырылады. Биыл педагогикалық, медициналық және шығармашылық мамандықтарды қоспағанда, қабылдау емтихандары болмайды.

Естеріңізге сала кетейік, мемлекеттік тапсырыс "ақша студентпен бірге жүреді" қағидаты бойынша бөлінетін болады. Яғни, егер бұрын білім басқармалары гранттарды колледждер арасында бөлген болса, енді олар колледждер арасында талапкерлердің таңдауы бойынша беріледі.

Конкурс аттестаттағы міндетті және бейіндік пәндерден қойылған бағаның орташа балы бойынша өткізіледі.

– Байқау бірнеше кезеңге бөлінген. 29 шілде мен 2 тамыз аралығында – шығармашылық мамандықтар, 16-19 тамыз аралығында – педагогикалық мамандықтар бойынша. 9-сынып негізінде оқуға түсетін талапкерлер арасында мемлекеттік тапсырысты бөлу 19-22 тамыз аралығында, ал 11 сынып түлектері үшін 22-25 тамыз аралығында өтеді. Мемлекеттік тапсырыс бойынша оқуға қабылдау туралы ақпарат талапкердің жеке кабинетіне келеді, – деді БҒМ Техникалық және кәсіптік білім департаменті директорының орынбасары Ернат Жүнісов.

Еске сала кетейік, құжаттарды қабылдау 25 маусымда басталып, 18 тамызға дейін жалғасады.