• USD 468.56

  • EUR 497.56

  • RUB 7.3

  • CNY 67.18

29 Наурыз, 05:02:25
Алматы
+35°

Фото: Жамбыл облысы әкімінің баспасөз қызметі

Ержан Жылқыбаев Тараз қаласының әкімі болып тағайындалды, деп хабарлады Жамбыл облысы әкімінің баспасөз қызметі.

"Жамбыл облысы әкімінің өкімімен президент әкімшілігінің және қалалық мәслихат депутаттарының келісімімен Ержан Жылқыбаев Тараз қаласының әкімі болып тағайындалды" делінген хабарламада.

Облыс орталығының жаңа әкімін қала активіне аймақ басшысы Бердібек Сапарбаев таныстырды.

– Айтқазы Қарабалаевтың атқарған жұмысына рахмет айтамын. Тараз облыс орталығы болғаннан кейін оның дамуы аймақтың дамуына тікелей байланысты.

Ержан Жылқыбаев біраз жерде қызмет атқарды, сыннан өтті. Тараздың дамуына бар тәжірибесін салады деп сенемін. Ең бастысы, бірігіп жұмыс істеу керек. Тараз мәдени, туризм ордасы болуы керек. Былтырғы жыл Қордайға көп көңіл бөлінсе, биыл Таразға ерекше назар аударылмақ. Халықтың жағдайын жақсарту, әлеуметтік нысандар салу, инфрақұрылымды,  келбетін жақсартуға көңіл бөлінеді, – деп атап өтті Бердібек Сапарбаев.

Айтқазы Қарабалаев Тараз жұртына алғыс білдірді. Ал жаңадан тағайындалған әкім Ержан Жылқыбаев артылған сенімді ақтаймын деп сендірді.

Ержан Жылқыбаев 1982 жылы туған, білімі жоғары.

М. Әуезов атындағы Оңтүстік Қазақстан мемлекеттік университетін "Экономист-менеджер", ҚР Президенті жанындағы мемлекеттік басқару академиясын "Мемлекеттік және жергілікті басқару магистрі", С. Аманжолов атындағы Шығыс Қазақстан мемлекеттік университетін "Заңгер" мамандығы бойынша бітірген.

Еңбек жолын 2003 жылы Оңтүстік Қазақстан облыстық экономика департаментінің бас маманы қызметінен бастады.

2006-2009 жылдары парламенттегі үкімет өкілдігінің бас сарапшысы, экономика және бюджеттік жоспарлау министрлігінің бөлім басшысы, еңбек және халықты әлеуметтік қорғау министрінің көмекшісі қызметтерін атқарды.

2009-2014 жылдары – ШҚО әкімінің аппараты басшысының орынбасары, Семей қаласы әкімінің орынбасары, Шығыс Қазақстан облысы әкімі аппаратының басшысы.

Әр жылдары президент әкімшілігінің мемлекеттік бақылау және ұйымдастыру-аумақтық жұмыстары бөлімінің мемлекеттік инспекторы, Алматы қаласы Медеу ауданының әкімі қызметінде болған, еңбек және халықты әлеуметтік қорғау министрінің бірінші орынбасары қызметін атқарды.

2020 жылдың ақпанынан бастап Жамбыл облысы әкімінің орынбасары болған. "Құрмет" орденімен, түрлі мемлекеттік және халықаралық наградалармен марапатталған. Үйленген, 4 баласы бар.

"Қамшы" сілтейді
Ілмек сөздер: Тараз Жамбыл әкім

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір