"Нақты шешімдер қабылдадым". Тоқаев жер мәселесіне қатысты мәлімдеме жасады

Президент Қасым-Жомарт Тоқаев шетелдік заңды тұлғаларға ауылшаруашылығы жерлерін сатуға, жалға беруге тыйым салуды тапсырды.

– Халқымыз үшін жер мәселесі қашанда аса маңызды. Бұл – мемлекеттігіміздің берік негізі және қасиетті символы. Қазақтың жері шетелдіктерге сатылмайды деп бірнеше рет айттым. Бұл мәселеге қатысты қауесеттерді тоқтату қажет, – деді ол.

Президент жерді сату және жалға беруге қатысты нақты шешім қабылдағанын айтты.

– Сондықтан мен мынадай нақты шешімдер қабылдадым. Біріншіден, шетелдіктерге және шетелдік заңды тұлғаларға ауылшаруашылығы жерлерін сатуға, жалға беруге заң жүзінде біржола тыйым салуды тапсырамын. Бұл шетелдіктердің үлесі бар заңды тұлғаларға да қатысты.

Мен мұны президенттің заң шығару бастамасы арқылы жедел түрде жүзеге асыру қажет деп шештім. Президент әкімшілігі дәл осы мәселеге байланысты тиісті заң жобасын әзірлеуі керек, – деді Тоқаев.