Трамп бөгде ғаламшарлықтармен келісім жасасқан – Израиль ғарыш қауіпсіздігінің бұрынғы басшысы

Израильдің ғарыш қауіпсіздігі бойынша бұрынғы басшысы АҚШ пен Израиль бөгде ғаламшарлықтармен байланыста екенін мәлімдеді. Оның айтуынша, АҚШ президенті Дональд Трамп бөгде ғаламшарлықтар туралы біледі, бірақ оны ашық жарияламауға келіскен. 

Израильдің ғарыш қауіпсіздігінің бұрынғы басшысы Хайм Эшед жергілікті Yediot Aharonot газетіне берген сұхбатында "Белгісіз ұшатын нысандар өздерінің осында екендерін жарияламауды сұрады, (оларға) адамзат әлі дайын емес" деп сұхбат берген.  

Сұхбат кейін ағылшын тілінде Daily Post газетінде жарияланды. Зейнеттегі офицер келімсектер адамзатқа қызығушылық танытып, "ғаламның тінін" түсінуге ұмтылатынын алға тартты.

Ол тағы бұл туралы АҚШ президенті де білетінін айтты. Израильдің ғарыш қауіпсіздігі бағдарламасын 30 жылға жуық басқарған Эшед келімсектердің галактикалық федерациясы бар екенін айтты және "олардың АҚШ-пен ынтымақтастығы Марстағы жасырын жерасты базасын қамтиды" деп мәлімдеді.

"Трамп [бөгде ғаламшарлықтар] туралы жарияламақ болды, бірақ галактикалық федерациядағы келімсектер күте тұруды және алдымен адамдардың тынышталуын сұрап отыр. Бөгде ғаламшарлықтар жаппай истерияны бастағысы келмейді. Олар алдымен біздің түсінуімізді күтеді" дейді бұрынғы басшы.

Эшед келімсектердің істерін құпия ұстауға келісім жасасқанын айтты.

– Олар адамзат дамып, ғарыш пен ғарыш кемесінің не екенін түсінетін кезеңге жетуді күтті, – деді Эшед.