Алматыда 490 адам коронавирус бойынша карантинде жатыр

Коронавирус жұқпасының алдын алу үшін, сақтық шарасына байланысты Алматы қаласының түрлі медициналық нысандарында 490 адам карантинде жатыр. Бұл туралы Алматы қаласының әкімдігі хабарлады. 

Инфекцияны жұқтырғандар Алматы қаласының 2 ауруханасына оқшауланған. 1 «а» санаты бойынша карантинге жатқызылған адамдар коронавирус жаппай таралған Иран, ҚХР, Оңтүстік Корея және Италия елдерінен келгендер.

14 күнге оқшауланған адамдардан қауіпті вирустың белгісі анықталмаған. Қоғамдық денсаулықты сақтау басқармасының хабарлауынша, 1 санаттағы елдерден келген тұлғаларға  2 жұқпалы аурулар ауруханасы мен көпсалалы 4 медициналық орталықта төсек-орын қарастырылған.

Басқарманың хабарлауынша, қазіргі уақытта ауруханаға келушілердің саны күрт көбейген. 14 күндік карантиннен бөлек, Алматыға Ұлыбритания, Нидерланды елдерінен келген тұлғалар 2-санат бойынша медицина қызметкерлерінің бақылауына алынған.

Шетелден келген азаматтар 10 күн дәрігерлермен байланыста болып, жағдайды хабарлап отырулары тиіс.

– Барлық келуші азаматтар осы жағдайға бірдей қарап, карантин мерзімін ұстауға тиіс, оны бұзғаны үшін әкімшілік айыппұл салынады. Медицина қызметкерлері бұл адамдарды таппаған жағдайда, Көші-қон қызметіне, шетел азаматтарын таппаған жағдайда ҰҚК-ге қосымша хабарлайды, – деді Алматы қаласының әкімдігі.

Әкімдік індеттен сақтану тек дәрігерлерге ғана емес, тұрғындардың тікелей өздеріне де байланысты деп айтты. Инфекцияның алдын алу  үшін мамандар адамдарға беті-қолын жиі сабындап жуып, қолды спирт антиспетигімен сүртумен қатар, адам көп шоғырланған жерлерге бармау керек екенін ескертті.

Сондай-ақ карантинге алынған адамдар ескертуді елемей, қонаққа барса әкімшілік жазаға тартылады деп атап өтті.