"Қытайда белгісіз індет тарады": Қазақстандықтарға ескерту жасалды

Әлеуметтік желіде "Қытайда шығу тегі белгісіз, қауіпті індет тарады" деген ақпарат қызу талқыланып жатыр. Алайда аталмыш ақпарат ресми түрде расталмаған. 

Тауарлар мен қызметтердің сапасы мен қауіпсіздігін бақылау комитетінің ресми өкілі Ержан Байтанаевтың хабарлауынша, желтоқсан айының соңынан бастап Хубэй провинциясының Ухань қаласында (Қытай) ресми түрде халықтың этиологиясы анықталмаған пневмониямен ауыруының 44 жағдайы тіркелген.

Бұл туралы Qamshy.kz ақпарат агенттігі tengrinews.kz сайтының дерегін негізге алып хабарлайды.

"Инфекция қоздырғышы осы уақытқа дейін анықталмаған. Көптеген жағдай қалалық жаңа теңіз өнімдері базарымен байланысты, онда құстың әр түрі, қоян, жылан және басқа да бауырымен жорғалаушылар сатылды", - деп түсіндірді ол. 

"Осыған байланысты осы елге сапарды жоспарлау кезінде Қытайда шыққан белгісіз пневмониямен ауыру жағдайлары туралы ақпаратты назарға алуды сұраймыз", - деп толықтырды Ержан Байтанаев. 

Бүгінде Нұр-Сұлтан қаласынан Бейжің, Санья және Үрімші қалаларына, Алматыдан Бейжің, Санья, Хайкоу, Сиань және Үрімші қалаларына тікелей әуе рейстері жүріп жатыр.

ҚХР-ға баратын тұлғаларға комитетте респираторлық инфекциялардың алдын алудың негізгі шараларын сақтауды ұсынды:

• Жіті респираторлық жұқпалар белгілері бар адамдармен байланысудан сақтану.
• Жиі қолды жуу, әсіресе науқас адамдармен немесе олардың ортасымен тікелей байланысқаннан кейін 
• Фермалардағы жануарлармен немесе жабайы жануарлармен жанасудан аулақ болу.
• Жедел респираторлық инфекция симптомдары пайда болған кезде медициналық көмекке жүгініңіз.