• USD 468.56

  • EUR 497.56

  • RUB 7.3

  • CNY 67.18

28 Наурыз, 22:48:28
Алматы
+35°

Ақтауда жаңа музей ашылды. Орталыққа мемлекет және қоғам қайраткері Әбіш Кекілбайұлының есімі берілді. Нысанның ашылу салтанатына ҚР Президенті Қасым-Жомарт Тоқаев, Әбіш Кекілбайұлының жары Клара Жұмабайқызы, елімізге белгілі ақын-жазушылар мен қоғам қайраткерлері және бірнеше елден арнайы келген қонақтар қатысты. Орталықтың дәл алдына терең ой, тегеурінді талант иесінің рухына құрмет көрсетіліп, абыз тұлға ескерткіші тұрғызылған. Шымылдығы түрілген еңселі ескерткіш - бүкіл саналы ғұмырын, еселі еңбегін туған халқына бағыштаған ардақты перзентіне деген иісі қазақтың шынайы көңілі. Мемлекет басшысы ескерткішке гүл шоқтарын қойып, маңғыстаулықтарды айтулы шарамен құттықтады.

       «Бүгін міне, заңғар жазушы, аса көрнекті мемлекет және қоғам қайраткері Әбіш Кекілбаев рухына тағзым етуге жиналдық. Бұл тек Маңғыстау жері  ғана емес, бүкіл еліміз үшін маңызды оқиға. Жаңа ғимаратқа қоныстанған тарихи-өлкетану музейіне  Әбіш Кекілбаев есімі берілді. Ұлы ойшыл Әбіш Кекілбаев қандай құрметке де лайықты. Ескерткіш орнатуға ат салысқан барлық азаматтарға алғыс айтамыз,бұл -  Әбіш ағамыздың 80 жылдық мерейтойына лайықты тарту болды. Біз бүгін рухын ұлықтап отырған Әбіш Кекілбаев адамзаттық болмыстың жоғары деңгейіне көтерілген біртуар тұлға, қазақ халқының ұлы перзенті. Халықтың мақтанышына айналған азаматтардың есімін жадымыздан шығармау – баршамыздың парызымыз. Ол - Қазақстанның еңбек ері атағына ие болған тұңғыш қаламгер. Әдебиетте ұлттық сананы сақтау үшін мол еңбек еткен. Жазушының еңбектері әлем әдебиетінің алтын қорына тиесілі. Әбіш ағамен парламентте әріптес ретінде етене араластым. Оның «Тәуелсіздік - тәтті сөз ғана емес, ұлттық жауапкершілік» деген тұжырымы баршаға ой салады», - деген ҚР Президенті Қасым-Жомарт Тоқаев жастарды Әбіш Кекілбаевтың қоғамдық-саяси көзқарастарын танып-білуге шақырды. 

         Биіктігі тұғырымен қосқанда 6 метрді құрайтын еңселі ескерткіш қоладан құйылды. Ал, тұғыры гранитпен қапталған.

         Президент бастаған ресми делегация орталықтағы Әбіш Кекілбайұлы есімі берілген музеймен танысып, мұражайға Ұлы Абайдың картинасын сыйға тартты. Ауданы 8742 шаршы метрді құрайтын облыстық тарихи-өлкетану музейі жазушының өмірі мен шығармашылығына және мемлекеттік қызмет жолына арналған экспозициялық залдардан тұрады.

         Музейде Әбіш Кекілбайұлына арналған жаңа кітаптар таныстырылды. Әбіш Кекілбаев шығармаларының 25 томдығын шығару жобасы қолға алынған еді. Соның 7 томы "Жазушы» баспасынан басылып шықты. Ғарифолла Әнес таңдамалы энциклопедиялық жинағын топтастырды. Бұл күні Сауытбек Абдрахмановтың«Абыз» атты кітабының тұсауы кесілді.Ал, Маңғыстау облыстық мәдениет басқармасы жасаған «Әбіш әлемі» фотоальбомы да көпшілік назарына ұсынылды. Әбіш КекілбайұлыӘбіш КекілбайұлыӘбіш Кекілбайұлы

        

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір