13 Маусым, 2017 NEWS

ЕЛБАСЫ ГРУЗИЯ ПРЕЗИДЕНТІ ГЕОРГИЙ МАРГВЕЛАШВИЛИДІ ҚАБЫЛДАДЫ

Нұрсұлтан Назарбаев Қазақстанға ресми сапармен келген Грузия Президенті Георгий Маргвелашвилимен кездесті, деп хабарлайды

Нұрсұлтан Назарбаев Қазақстанға ресми сапармен келген Грузия Президенті Георгий Маргвелашвилимен кездесті, деп хабарлайды Қамшы ақпараттық агенттігінің тілшісі.

Мемлекет басшысы Грузия Президентінің сапары айтулы оқиғаларға – елдеріміз арасындағы дипломатиялық қатынастардың 25 жылдығына және «ЭКСПО-2017» халықаралық көрмесінің ашылуына тұспа тұс келіп отырғанын атап өтті. 

– Сіздің осы сапарыңызға және Грузияның көрмеге қатысқанына дән ризамыз. Біздің қарым-қатынастарымыз әркезде де жақсы болды. Елдеріміз тәуелсіздіктің алғашқы жылдарында бір-біріне жан-жақты көмек көрсеті. Қазақстан Грузия экономикасының негізгі инвесторларының біріне айналды. Екіжақты қатынастарды одан әрі жақсартуға ешқандай да кедергі жоқ. Бұл тұрғыда Сіздің сапарыңыздың маңызы зор, – деді Нұрсұлтан Назарбаев.

Грузия Президенті еліміздің даму қарқынына қызығушылық танытып, Қазақстанға келуге көптен ықыласты болғанын айтты.  

– Сіздің және халқыңыздың қиындыққа толы осы жылдарда ауқымды жұмыс атқарғандарыңызды қазір өз көзіммен көріп отырмын. Грузин халқы Сіздің еліңіз бен жеке өзіңіз тарапынан көрсетіліп жатқан қолдауға ризашылық білдіреді және оны бағалай біледі. Грузияның «ЭКСПО-2017» көрмесіне қатысуы аса маңызды деп санаймын. Біз онда өз экономикамыздың жетістіктерін көрсетіп, дәстүрлі тату көршілік байланыстарымызды жалғастыра аламыз, – деді Г.Маргвелашвили.

Сондай-ақ Грузия Президенті экономикалар ынтымақтастығының тұжырымдамасына өз елінің белсене қатысып, халықтар арасындағы диалогты дамытуға жағдай жасап отырғанын атап өтті.

– Сіздің осы бағытта орасан зор жұмыс атқарып жүргеніңізді білемін. Біздің елдеріміз тәуелсіздікке қол жеткізген сәттен бері дәл осы бағытта дамып келеді, – деді Г.Маргвелашвили.

Соңында Грузия Президенті Нұрсұлтан Назарбаевқа ұзақ жылдардан бергі қолдауы үшін зор алғыс білдіріп, Астанадан алған әсерлері жөнінде айтты.  

 

Gulim Zhaqan

Әл-Фараби атындағы Қазақ Ұлттық универистиетінің филология және әлем тілдері факультетін бітірдім. 2017 жылдан бері Qamshy.kz ақпарат агенттігінің тілшісімін. 2016 жылы оқуды бітіргенімде ұстаздық ету немесе журналист болу деген екі түрлі таңдау тұрды алдымда. Біріншісін көрейін деп алғашында кішігірім курстарда сабақ беруден бастадым. Кішігірім курстардың өзінен шабыт ала алмаған мен өзгеден бұрын өзіңе үйретерің көп болуы тиіс білім бұлағы мектепке барудан тартындым. Сөйтіп шабыттардың, шығармашылықтардың мекені - журналистикадан бірақ шықтым. Жаздым, жазып жүрмін, жаза беремін - бұл менің өмірім! Болашақта өзге басылымдарға ауыссам да, қамшы қолымнан ешқашан түспейді. Осыны түсіндім.

Автормен оның Facebook парақшасы арқылы хабарласуға болады.

Жазылыңыз

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Баннер

Пікір қалдыру

пікір